Ус хаанаас урсана тэнд
Ундарга байсан байж таарна

Үер хаана бууна тэнд
Үүл хурсан байж таарна

Амжилт хаана дэлгэрнэ тэнд
Алдаж эндсэн байж таарна

Амьдрал хаана цэцэглэнэ тэнд
Агуу ухаан оршсон байж таарах уу?

Зүүдний мэдрэмжээс салж
Зүрхний мэдрэмждээ хөглөгд

Үүлний мэдрэмжээс салж
Үнэний мэдрэмждээ хөглөгд

Хөвөх хэдий сайхан ч
Хөрсөнд буух нь гайхам

Сэлэх хэдий гайхам ч
Сэрүүнд байх нь даарам

Тархиа тахиж
Зүрхээ Зүү
Өөр юу ч танд үл зохино

Бид хичээнэ...

Замын холд ядрахгүй
Заяаны холд шантрахгүй
Үйлийн ихээс буцахгүй
Үнэний чигээс няцахгүй 

Хар бурууг ялласан 
Хазгай бурууг хадарсан
Харалган нэгнийг хандуулсан
Хавирга сүвээгээ хамгаалсан ,

Хатан зоригт үрсийн
Хамаг цаг ирлээ.

Зүдгүүр бүхнийг туулсан
Зөрүү бүхнийг туйлсан

Заль хорыг тэнссэн
Заяа үйл нь тэнцсэн
Зам бүрээ тандсан
Засаг жамыг таньсан

Зол сайт бүхний
Зорьсон цаг ирлээ

Эх оронч танд

Тэнгэр танд тэмцэх цөс хайрлажээ
Тэнгис танд харших мөс хайрлажээ

Тэвчээр ухаан зориг
Тэнхээ хүсэл хяслыг,
Уулсын бараан нөмөр
Улсаа засах ухааныг,

Золь болох зориг
Зовлого болох цогцсыг

Эх орон чинь танд
Элэг зүрхнээсээ эмтэлж
Эгэм яснаасаа дундлан байж

Харам үгүй хайрлаж дээ.

Хийрхлийн хөөсөн далайгаас ангижирч

Хэнээрхлийн өнгөн давалгаанаас мултарч

Дотоод үнэнээрээ гаднаа гоёх

Догшин цагийн зүү наашаа